خلونا نختم السنة المهمة ديه بالحوار المجتمعي الافتراضي الجميل ده كمحاولة لرسم بعض ملامح واقعنا الظريف اللطيف بزيادة
_ يا جماعة أنا حابب أفكركم إني نشرت السنة دي بحث علمي بيررفيود
=ما شاء الله ألف مبروك بس مش أول ولا آخر واحد يعمل كده يعني
_ايوا بس على فكرة ده في مجلة تابعة لنيتشر
=بجد برافو بس في ناس ناشرة في مجلات أكبر من مجلتك ومصدعتناش كده برضو
_أصل ديه حاجة اشتغلت عليها سنين طويلة
=ممممم طيب بالتوفيق
_وبعدين ده مش امتداد طبيعي لدراستي الجامعية ولا شغلي أنا درست عشان الورقة ديه حاجات كتير ابتديتها من الصفر وكل ده كان تعلم ذاتي من غير مساعدة ولا مثال سابق أمشي عليه عشان أعرف وجهتي ومكنش في أي دعم كمان
= يعني ده مش أصل تخصصك ... بس شغل كويس مش بطال والله
_لا ما أنا عشان أكتب ورقة زي ديه قعدت أدرس ما يعادل برنامج درسات عليا كامل للماستر أو الدكتوراة بس ده بقي مكنش برنامج جاهز ومواده مشروحه وله مشرف يوجه الطلبة وده أمر يخليه أصعب بكتير .... فده بفضل الله نجاح استثنائي بكل المقاييس ومشوار كان صعب جدا .. دي حاجة كده زي واحد كان بيغرق وسط المحيط حرفيا وبعدين عام ووصل لحد الشط أو كأنك دخلت جراج بيتكم القديم تخبط في الخردة وخرجت بعد شوية طاير بطيارة هليكوبتر
=ايو ايوا طبعا... هو للأسف مكنش عندنا جراج في بيتنا القديم بس انت ابن حلال وتستاهل كل خير لكن يعني over شوية
_ لا أبدا والله.. ده كمان مش بحث تقليدي زى الأبحاث اللى بتتعمل بس عشان التمويل الأكاديمي يستمر أو الترقية الروتينية في السلك الوظيفي لا ده بيقدم نتائج مهمة جدا ومختلفة تماما في مجال ساخن وغني بالأبحاث القوية.
=جميل بس خلينا نستني لما نشوف الأول رأي المختصصين ايه في شغلك ده
_لأ ما هو بحث بيرريفيود يعني متراجع في مجلة علمية من قبل المتخصصين يعني بمجرد معرفتك بانه اتنشر فانت كده عرفت فعلا رأى المتخصصين و على فكرة هو بيقدم نتائج واضحة محددة بالأرقام ممكن أى حد يعيد اختبارها بنفسه و ممكن كمان تنفيذها تجريبيا في نطاق علاجي واسع جدا والأهم من كل ده انه ممكن يحسم جدل كبير حول نظرية التطور وده أمر غير مسبوق فعلا.
=...ايه! انت قلت تطور؟ ...لا معلش بقي خرافة التطور ديه مش محتاجة أبحاث اصلا عشان تهدمها استني حبعت لك فيديو نسفها نسف حتشوفه وتدعيلي..... /لا معلش بس نظرية التطور حقيقة علمية وبحثك ده ملوش تأثير في مقابل الإجماع العلمي..... /لا معلش التطور لا يتعارض مع الدين أصلا بل هو سنة الله في الخلق.... /لا معلش موضوع التطور كله كده على بعضه مش مهم وملوش أى أثر على الدين سواء قبلته أو رفضته باستثناء قضية الخلق الخاص لآدم لأن فيها نص شرعي..../لا معلش انت عملت كل ده عشان فاكر إن دليل الغائية ده من أصول الدين والدفاع عنه أولوية عقدية ورد شبهات وكده؟ انت فعلا مسكين...../لا معلش لو سمحت بلاش تخلط أوراق العلم بالدين عشان العلم متغير والدين ثابت.../لا معلش الشباب مبيلحدش عشان تطور ولا بتاع هم بس مهزومين نفسيا وجهلة بدينهم يعني خليهم يلتحقوا بالدورات الشرعية وكله حيبقي تمام..../لا معلش انت بجد عاوزنا نسيب تريند أبي حنيفة وتنظيم قطر لكأس العالم اللى حسن صورة الاسلام قدام الأجانب ونقعد نفك في كلاكيع الأبحاث العلمية.... /لا معلش...
_خلاص يا جماعة أنا آسف والله.....
تعليقات
إرسال تعليق